Ålles muss mer ned verschdee…

Nachdem ich mehrfach darauf angesprochen wurde, dass vielen Lesern
die Glosse sehr schwer fällt, aber gefällt, hier jetzt der Versuch
zum Mitlesen... Wenns gut ankommt, in Zukunft immer... awer a weng
was würd ich scho gern. Nachdemm ich mich die Dåch mid a båar
globalere Zusammenhäng beschäfdichd habb, bin ich uff a weng Zeuch
aufmerksam gwornn, wo ich amål nein Raum schdell wolld. Ganz echd,
des sinn ned nur Schbrüch, sondern a echde Fråchn wo ich kee
Andword druff hab. Nadürlich liechd des a aweng daran, dass ich
nimmer der Jüngsde bin, awer ich glebb, ned nur. Wenn ich guck, wie
früher die Sachn, wo die Leud für uffgschdanne sin so nach und nach
besser gworrn sin, nacherd had des an Sinn ghabbd. Glår had ned
ålles fungzionierd, awer s had zumindest an Sinn ghabd. Die Leud
sin fürn Friedn uff die Schdrass gangen, hamm Konzerde für die arme
Leud in Afrigga gmachd, sin für die Umweld demonsdrier gangen un
für ihre Rechde. Gechn Ausbeudung, gechn Ungerechdichkeid un
meisdens gechn die Bonzn un Konzerne. Heud gehn die Leud meisdns
går nimmer uff die Schdrass un wenn gechn die arme Leud, für die
mir früher demonsdrierd und gsammeld hamm. Die Leud dun dahämm
hock, weil se dodål ferdich sin, von derre freiwillichn
Üwerschdund, wo mir früher abschaff hamm woll. Dun ihrn ganzn Dreck
möchlichsd billich irchndwo käff, der wo dann durch ganz
Deudschland fahr gmuss wird. Vo arme, unnerbezåhlde eichns dafür
angekarrde Ausländer. Mindesdlohn, dass ich ned lach du. Uffm
Babier. Die Dieselabgaas vo die Schbrinder sin dann nadürlich a
widder Scheiße. Awer billich isses håld. Un der mündiche
Indernednudzer vo heud wäss genau, wo er sei War hergrichd. Im
Nodfall aus China. Weil des alles dodal irrsinnich un wahnwidzich
is, brauchd mer dann ja doch a widder an Ausgleich fürs Gewissn.
Vegån läbb, von Broduggdn, die wo die findiche Indusdrie exdra als
Ablassbrieflie broduzier dud. Gechn des schlechde Gewissn. Färe
Smardfons, mid denne mer dann a üwerall widder neis Nedz geh kann.
Draumhaffd. Bio, Fähr, Vegån un so weider. Was früher die Kirch
gmachd had, nämmlich die Leud des Geld aus der Daschn zongg, mid
Ablassbriefli un Heilsverschbrechn, is allaweil nahdlos in die Händ
vo unnere neue Goddesheuser ganggn. Sangd Amazon, Sangd Billicher
Sangd Guugl, Sangd Media Margd un üwerhaubd Sangd Großkonzern. Ned
nur, dass mer sein Ablassbrief griech dud, mer kann a noch dodål
askedisch lebb. Reduziere dein Leben is a so a geile Masche. Alles,
was mer früher schö in Regåle neigschdelld had, brauchd mer nimmer.
Die Bibliodeeg is uffm Rieder, die Filmli bei Nedflix. Die
Bladdnsammlung schdehd auf ebay, weil mer eh alles über Sboddifei
oder halblegal im Nedz griech dud. Riduus do se Mäx oder schau
amål, wie askedisch ich lebb du! Kenn Ballasd und kenn Besidz.
Doll. Wie gsåchd, vielleichd bin ich zu åld für den ganzn Scheiß.
Enner vo die ewich Gesdrichn. Awer ich kann nein Schbiegel guck, ah
ohne solche Hilfsmiddeli. Ich bin gern von Büchli und so Zeuch
umgeem. Ich brauch kei Niu Aidsch Fuud fürs Gwissn un kei Biobrause
von bländer.de . Mir is ganz einfach dodål viel wichdich, was gwaxn
un echd is. A wilder Bergbach is eefach schönner, wie der
renadurierde Landschafdsgärdnerdraum neben der Bunnesschdråß. Und
unner ålder Lådn is mer hald a lieber, wie uffgebb - und nacherd
kommd irchend so an neuer Hippsdagelumplådn nei, wos exdra
nåchhaldiche Redrobüchli gebb dud. Mid garandiert wenich Inhald
awer unglaublich beeindruggnder Obdigg. Und indegrierdm
Ablassbrief. Wenn euch des a so gehd, nacherd könndser amål mein
ånnern Beidråch les. Thema: Glosse Sprecher: Gerd