Ka I?

Vom Låden und vom Leben Nummer 30 - Ka I? (...wie immer zum hören
und mitlesen oder lesen und mithören, ganz wie ihr wollt) Vom Låden
und vom Leben (audiofile #30: KI) Habdser was gemerggd? mir sin
edzad ålle ganz schö brav und nedd gwesn. Zeid, amål widder
annersch zum redd. Drodzdem såch ich erschdamål servus ihr Liehm
dord drausn. Wie immer, wenn ich fränggln du, gibbds den Dexd zum
midlees auf unnerer Seidn. Dess is edz scho a ganze Weile
Draddizion. So wie a annere Sachn. Wenn ich rechd drüwer nachdengg,
gibbds in unnern Boddgaasd a ganze Menge vou Draddizionen. Is ab un
an a weng anschdrengend, wemma sich ede Woche was aus die Finger
sauch muss. Awer ganz echd, es machd a a Fazzngaudi. Mir daugn
middlerweile ned blos mei "normåle" Folchn, sonnern a die, wo der
Börn sei Blauderegge eddablierd hadd. Und ganz ehrlich a unner
Gschichdli, wo ich mid menner Fraa eilees du, machn Schbass und dun
mir immer rechd leichd vo der Hand geh. Blöderweise gibbds a annere
Dradizionen. Des sin awer welche, wo mir ned beeifluss könn. Zum
Beischbiel die Draddizion, dasmer im Buchhandel allerweil zwä mål
im Jåhr des Brogramm beschdell muss. Dass des middlerweile kä Freud
mehr is, hab ich scho mehr wie emmål verzähld. Und glebbds mer, es
wird ned besser. Weder dechnisch, wo ich ja echd noch Hoffnung
ghabbd hab, noch vo der Schdruggdur her. Also der Börn hadds bei
vieln Verlåchn noch ganz eefach. Die dun die Comix nämmlich wirgli
noch als Schonre behandln. Nacherd is in so emm Brosbeggd a
eichndlich alles wichdich. Is hald a Gewerch, die nacherd
durchzumgeh, awer wenichsdns konsisdend. Bei di Büchli isses a
Graus. Da gibbds nach wie vor kennen vou die grossn Verlåch, wo des
Schonre sich draud druffzummschreib. Awer is ja a ålder Huud. Is
hald so und dud sich wohl nimmer ändern. Wär hald schö... Zum Glück
gibbds ja noch a boar glenne, neue ambizionierde Verlächli, wo sich
auf unner Schonre eigschossn hamm. Immerhin a Vordeil. Awer
drodzdem isses hald immer widder so, dass mir jede Menge Büchli
durchfall du. Also drodz echd konzendrierder und genauer Suche
durch die Labbn geh dud. Und dann kommds ihr neis Schbiel. Wennsder
so an Fund habb dud, nacherd solldedsder mir des so schnell wie
möchlich middeil. Also an guudn Diddl, wo mir durch die Labbn gangn
is. A da is widder des A un des O die Kommuniggazion. Ich will da
edz a goar ned meggern. Bei a boar vo euch dud des brima
fungzionier. Echd aufrichdichn Dangg dafür. Awer insgsammd is des
mid derre Kommuniggazion so a Sach. Dafür müssd mer hald a öffder
im Lådn sei. Und echd, dess is a Graus. Ich jammer nedd. Ich du a
ned schänd. Ich dus blos nedd verschdee. Wie hadd des bloos sei
gekönnd, dass sich innerer so kurzn Zeid, die Gewohnheidn vo die
Leud derårdich veränderd hamm? Wieso hamm die mässdn eefach kenn
Bogg mehr, innen Lådn zum geh und zum draadsch? Liechd des da
drann, dassder kei Zeid mehr habbd? Weildsder von analooch auf
diggidål umgschdelld habbd? Also ich habb neulich so enn echd
widzichn Kommendoar gsenn. Zur künsdlichn Indelligenz. Da hadd
enner gschriem, daas die KI dafür gedachd wår, uns die Arbett
abzumnemm. Also Budzn, Sauchn, Abwasch und so weider, damidd mir
mehr Zeid hamm, für die schönen Sachn im Lehm. Måln, schreib und so
weider. Greadief ehm. Edz isses awer so, dass die KI die Bildli mal
dud und Gschichdn schreim. Damid mir mehr Zeid fürn Abwasch und
fürs budzn hamm. Fand ich echd gud. Und erschd a a weng widzich.
Aber nacherd hab ich a weng drüwer nåchdachd. Mir hamm edz scho
unglaublich viele elegdrohnische Hilfn. Im Lådn, a dahämm und wo
weiß ich noch. Awer Arbett isses ned wenicher worrn. Dud uns der
ganze Missd wirglich helf? Is dess echd e Erleichderung, wenn mei
Audo alles kå? Oder verbringgd des nacherd blos mehr Freizeid bein
Händler, inner Wergschdadd? Und ich du mei Zeid damidd verbring,
die Gebrauchsanweisung halbwegs zum verschde? Bin ich echd zu blöd?
zu åld? oder hilfd uns der ganze Missd kenn Deud.